SA KUSHTON NË TË VËRTETË KROÇERA?

Data : 18-08-2020

Autori : Delinda Muçollari

Sa kushton në të vërtetë kroçera? Ja përgjigjia!

Ke qenë ndonjëherë me pushime dhe shpenzimet të kanë dalë jashtë kontrollit? Nëse është rasti yt, do të thotë se nuk je i mirë në organizim dhe parashikimin e shpenzimeve. Për këtë të nevojitet asistenca e një agjenti të zotë udhëtimesh. E nëse nuk e njeh një të tillë, ja ku po të rendis shpenzimet e detajuara të një udhëtimi me kroçerë nga shtëpia në shtëpi. Kjo po që është ALL INCLUSIVE!


 

Viza

Me pasaportën shqiptare, sot mund të vizitojmë plot 114 shtete pa vizë, me vizë në mbërritje ose vizë elektronike. Kjo do të thotë se larmia e shteteve që mund të vizitojmë lirisht është e madhe, ama janë disa shtete që ende kërkojnë domosdoshmërisht një proces të gjatë të vizave të cilin duhet ta masim si shpenzimin kryesor të udhëtimit, sepse pa të, as mund të ëndërrojmë të udhëtojmë jashtë vendit. Për shembull për të vizituar Shtetet e Bashkuara të Amerikës nevojiten viza e kategorive të ndryshme, ajo turistike është e kategorisë B2 dhe kushton minimalisht 160 dollarë (tarifa e aplikimit), për Emiratet Arabe gjithashtu nevojitet viza që kushton më tepër se 100 euro tarifë, për Britaninë e Madhe kostot janë të ndryshme dhe fillojnë nga 100 pound për qëndrimin më të shkurtër në këtë vend. Po ka vende të tilla ekzotike si Antilet Franceze, Brazili, Maldive, Singapori që nuk kërkojnë një detyrim të tillë dhe kjo është fantastike për udhëtarët.

Image

Fluturimi

Sa më i largët të jetë destinacioni, aq më i shtrenjë është fluturimi – thonë. Por nuk është gjithnjë e vërtetë. Nëse shpenzon pak kohë për të studiuar linjat e fluturimeve, mund të gjesh datat e duhura të udhëtimeve, aq sa një fluturim drejt New York-ut me tranzit nga Beogradi, të kushtojë më pak se një fluturim Tiranë – Milano në kohë fluksi. Nëse do lundroni drejt Karaibeve duhet të përgatiteni për të paktën një vlerë prej 500 eurosh për biletë vajtje-ardhje, pak a shumë e njëjta me Emiratet. Nëse linja Pegasus, ka ditë oferte, mund të përfitoni një çmim shumë më të mirë, me një ndalesë të gjatë në Stamboll. Yaaay! Kohë për të eksploruar edhe Stambollin! Nëse kroçera jote do të jetë në Mesdhe, nisjen mund ta bësh nga porti i Genovës ose Civitavecchias me një kosto nga 150 deri 200 euro.

 

Trageti

Disa prej kroçerave e nisin itinerarin e tyre nga Bari dhe një opsion udhëtimi drejt këtij porti është lundrimi me tragetet GNV, Adria Ferries, Venturis Ferris etj. Zgjidhja perfekte për ata që kanë frikë nga fluturimi dhe për ata që duan një kabinë personale gjatë udhëtimit. Kabinat kanë 2 deri 4 shtretër dhe një tualet brenda. Kostoja mund të shkojë rreth 200 euro për kabinë për një rrugë nëse udhëtoni në çift ose me fëmijën tuaj.

 

Hoteli

Disa destinacione të largëta e bëjnë të domosdëshëm rezervimin e një hoteli në mbërritje. Nëse fluturon drejt Dubait, avioni do të mbërrijë atje pas mesnatës, ndaj është e këshillueshme të rezervoni një dhomë hoteli pranë aeroportit që të pushoni. Kështu ditën e nesërme do të jeni të freskët për të nisur kroçerën tuaj. Hotelin mund ta shihni si opsion edhe për më gjatë nëse imbarkoni nga Majami dhe doni të shijoni South Beach për disa ditë para ose pas kroçerës. Destinacionet që nuk e kanë të nevojshme hotelin janë Genova, Roma, Venecia, sepse fluturimet e mëngjesit ju çojnë në kohën e duhur në qytetet përkatëse dhe do jeni gati për të kapur checkin-in në mesditë.

Transfertat

Shpesh aeroportet janë larg nga porti i nisjes së kroçerave ndaj duhet të mendoni se me cilin mjet do ta bëni transfertën. Distanca nga aeroporti i Milanos tek porti i Savonës është rreth 3 orë me autobus. Distanca nga aeroporti Fiumicino i Romës tek porti i Civitavecchias është rreth 40 minuta. Zgjidhja më e mirë është t’i bashkoheni autobusit që vë në dispozicion kompania e kroçerës për të qenë edhe komodë edhe të sigurt. Këto transferta kushtojnë nga 18 deri 35 euro vetëm vajtje për rrugën më të gjatë. Nëse distanca aeroport-port është e vogël siç ndodh në qytetin e Genovas, mund të konsideroni edhe marrjen e një taksie sepse rruga zgjat vetëm 15 minuta. Për transfertat brenda Emirateve Arabe jeni edhe më të qetë sepse çmimi i karburantit atje është shumë herë më i lirë.

 

Kroçera

Paketa e akomodimit në anije ka një milion variante dhe çmime, ndaj i përshtatet të gjithë xhepave dhe shijeve. Për kroçerat më të shkurtra 3-4 ditore për paketën bazike nuk do të shpenzoni më tepër se 300-400 euro për person. Për kohëzgjatjet 7 apo më shumë netë, vlera varion nga 500 deri 1500 euro në kompanitë italiane MSC, Costa dhe ato amerikane Royal, NCL, Carnival ose Celebrity. Në këtë tarifë përfshihet akomodimi në kabinë, pension i plotë i vakteve në restorante dhe bufe, aksesi në teatër, kinema, baret me muzikë live, spektakle, lojrat dhe fushat sportive. Nëse jeni në kërkim të luksit, atëherë duhet të zgjidhni anijet me kapacitet 100 deri 1000 persona me një shërbim të personalizuar dhe të akomoduar në suite me veranda. Çmimet për këtë kategori anijesh si Crystal, Oceania, Regent etj variojnë në disa mijëra dollarë dhe aty do të keni gjithçka të përfshirë, madje edhe alkool pa limit.

 

 

Bakshishet

Kompanitë amerikane të kroçerave nisën traditën e bakshisheve të detyrueshme për punonjësit e restorantit, të shërbimit të dhomës, pastrimit etj. Ndaj në varësi të kompanisë, një pushues është i detyruar që në fund të ditës të paguajë 10 euro ose dollarë si bakshish që do të ndahet më pas në mënyrë të barabartë mes punonjësve. Kompanitë vendosën kështu, në mënyrë që çdo punonjës të përfitojë diçka sikurse të tjerët. Ka disa kompani si Norwegian Cruise Line që i ka opsionale këto tarifa. Ky fakt nuk e shmang gjithsesi mundësinë për të falenderuar vetë kamarierin tuaj të preferuar.

 

Pijet

Paketa bazike e kroçerës do tju limitojë në zgjedhjen e pijeve në bord, nëse jeni dashamirës të alkoolit. Për një paketë të plotë duhet t’i kërkoni agjentit tuaj që tju shtojë paketën ekstra të pijeve që varion rreth 200 deri 300 euro personi për 7 ditë qëndrim dhe rreth 100 euro për fëmijët dhe mund të pini në bare, restorante e bufe pa limit kohe e sasie. Paketat Premium ju ofrojnë edhe cilësinë më të mirë të pijeve. Është gjithashtu e mundur që këtë përzgjedhje ta bëni në bord me konsulencën e një kamarieri. Momentalisht MSC Cruises ofron paketën Dine and Drink duke ju ofruar në çmimin e kroçerës edhe pijet gjatë vakteve. Norwegian Cruises njihet për paketat Free style ku me 99 euro mund të shtoni një paketë të mirë pijesh.

 

Shpenzimet në porte

Itinerari i kroçerave viziton gjithnjë vendet më interesante dhe me shumë mundësi argëtimi, ndaj në një mënyrë a një tjetër do tju duhet të shpenzoni edhe aty. Opsioni i parë janë eskursionet e organizuara nga stafi i kompanisë, me kohë dhe çmime të ndryshme duke filluar nga 30 euro për person. Nëse do të shëtisni vetë, kini parasysh: Disa qendra qyteti ose plazhe janë larg nga porti i anijes ndaj do tju duhet një taksi private ose transferta me autobusin e vënë në dispozicion nga kompania ose nga shërbimet e qytetit. Ndonjëherë mund të shkoni në plazhe private ku veç tarifës së hyrjes, do të konsumoni pije ose edhe vaktin e drekës aty. Disa qytete të tjera kanë qendra të mëdha tregtare ku do të doni të përfitoni nga ofertat. Palma de Mallorca është një shembull i tillë, ku ofertat janë vërtet të tilla për brande të ndryshme. Nëse shkoni në ishullin privat Atlantis në Nassau, Bahamas, do të duhet të paguani tarifën e hyrjes nga 30 dollarë për vizitë në akuarim deri në 100 euro për të notuar me peshkaqenët. Nuk po ju përmend më mirë kazinonë gjigande aty brenda, ku rrallë se fitohet.

 

Për çdo shpenzim tjetër që keni hasur, mund të më pyesni se cila do ishte mënyra më e mirë për ta menaxhuar. Gjithashtu edhe nëse keni nevojë për detaje mbi porte specifike, feel free.

 

Lajme të tjera Blog

PËRSE NE